狗狗覺得凍嘅 6 個表現

近日天氣轉冷，唔少狗主都擔心屋企嘅狗狗會冷親。其實屋企嘅狗狗係咪真係凍，可以從觀察得知。睇吓狗狗有冇以下呢 6 個行為，如果有嘅話，就極有可能代表狗狗真係覺得凍。

1. 身體發抖

狗狗如果感覺凍，其實同人一樣，一樣會打冷震，身體會不停震抖。有啲狗狗感覺凍，除咗會打冷震之外，甚至會將尾巴捲起，減少體溫流失。

2. 耳朵及無毛嘅地方冰冷

想睇吓狗狗係咪真係覺得凍，就要嘗試摸吓佢身體無毛嘅地方，例如耳朵及手掌及腳掌。如果佢嘅耳朵及手掌及腳掌都係冰冰涼涼嘅，就要好好幫佢哋保暖喇。

3. 反應緩慢，行路姿勢跟平日唔一樣

平時一叫狗狗，佢會立即跑過嚟；但係如果佢感覺凍，反應就會變得緩慢，行路姿勢同平時唔一樣，感覺怪怪，可能因為地板凍，所以狗狗會吊起少少腳嚟行，減少手掌同腳掌同冰凍嘅地板接觸。

另外，如果秋冬同狗狗外出散步時，佢貼住你隻腳行，或走去你後方跟住你行，可能佢係想黐住你隻腳取暖，同搵你擋風。

4. 捲縮身體瞓覺

狗狗同人一樣，瞓覺感覺凍會捲縮身體，捲作一團，狗狗甚至會將尾巴捲縮於兩腿之間保溫。

5. 突然哀鳴

狗狗感覺凍嘅時候，可能佢會坐立不安，突然貼近你，並向你發出哀鳴。佢哀鳴其實係想話俾你聽佢凍，呢個時候，你就要好好幫佢保暖喇！

6. 睡眠時間變長

狗狗平均一日會斷斷續續瞓 13－15 小時，及至冬天，佢哋嘅睡眠時間會變得更長，有時甚至覺得凍到連去到食飯時間，佢哋都唔願意走出床鋪，唔肯行出嚟進食。

如何幫狗狗保暖？

幫狗狗保暖嘅方法有好多，例如幫佢哋著衫、盡量畀佢哋留喺室內活動、幫佢哋嘅狗窩加上保暖墊、使用電暖爐等。如果狗狗本身係瞓慣地下，而地板又係磁磚嘅話，可以用紙皮墊底，再鋪上毛巾幫狗狗保暖。