即睇 狗狗點解會做呢 3 個奇怪行為

你有無試過同狗狗講嘢時，佢會不停歪頭？狗狗散步時喺草地上便便後，佢會不停向後踢腳？狗狗每晚瞓覺前，佢會不停抓挖枕頭同被舖？

身為主人嘅你，可能對狗狗呢 3 種行為感到費解，但係美國動物行為學家 Dr. John Ciribassi 表示，狗狗呢 3 種行為係完全正常㗎！以上狗狗 3 種行為，Dr. John Ciribassi 將佢哋歸納為「本能行為」(Instinctual behaviors)。

1. 聽主人講嘢時，狗狗會不停歪頭？

解說 ：狗狗聽主人講嘢時，佢其實試圖搞清楚字句當中有無一啲佢能力範圍內能夠解讀嘅關鍵字。佢不停重複向左向右歪頭，表示佢正好專心咁聽，究竟有無佢可能認知嘅單字，例如 sit, come 或 down 等。

平日，主人可以多留意狗狗到底對邊種音調同邊啲字眼比較敏感，從而可以好好利用呢個優勢嚟訓練狗狗。知道邊啲單字狗狗反應會特別大之後，可以經常同狗狗講嘢時使用（狗狗服從時記得加以稱讚並獎勵），及後你就可以建立出一套專屬自己同狗狗嘅溝通詞庫。

2. 狗狗散步時喺草叢中便便後，會不停向後踢腳？

解說 ：狗狗腳上其實有分泌費洛蒙嘅腺體，佢哋腳分泌嘅氣味比尿液同便便嘅氣味更加強烈，而分泌嘅氣味能夠維持嘅時間更持久。因此，僅憑尿尿同便便嚟標示自己嘅領土，對狗狗而言係唔夠㗎！佢哋必須靠用腳踢，嚟留低比尿液及便便更強烈嘅分泌氣味先足夠。

3. 狗狗瞓覺前都會喺床舖上轉圈，並用前爪不停抓挖枕頭同被舖？

解說 ：呢個行為可以追溯到遠古時代，狼群們 （狗狗嘅祖先） 需要經常喺野外四出尋找築巢嘅理想地方。尋獲理想地之後，佢哋會喺原地轉圈嚟留低氣味，標示自己嘅領土，並用前爪不停抓挖地上嘅泥土以築穴建居。

嚟到今日，當我哋睇住屋企嘅狗狗進行相同嘅行為，你可能會覺得好搞笑，因為無論佢轉幾多個圈，抓挖幾耐，枕頭同被舖都仍然係佢嘅，無人會霸佔佢嘅地方。

資料來源：Decoding your dog by Dr. John Ciribassi