【暫托變領養】上年底上水街頭被救金毛「紳士」尋家成功

上年十月底，動保組織「傻媽流浪貓狗之家」收到多位熱心人士致電求助－一隻傷勢非常嚴重嘅金毛尋回犬喺上水河上鄉路徘徊...

「傻媽」去到現場發現一隻帶住笑容嘅金毛。狗狗非常乖巧，自行跟隨「傻媽」，好似完全知道「傻媽」係嚟幫佢咁。經醫生診斷，狗狗頸部耳仔位嚴重被烏蠅蟲腐蝕，肌肉壞死。頭頂、背部分別有唔同大小肉瘤，及前手有壞死腫瘤，手踭肌肉開始腐爛、全身牛蜱、蟲、嚴重皮膚病，體型極瘦。

「傻媽」為狗狗改名「紳士」，更立即為「紳士」安排做手術。幸運地，手術非常成功。及至「紳士」復康期間，「傻媽」表示曾有疑似主人出現。「呢位疑似主人只係輕描淡寫地講『我哋期間有揾過佢，不過我哋返工好忙！我哋無俾佢流浪㗎』，然後要求我哋交出『紳士』。」「傻媽」唔忍心年紀老邁，身體狀況唔穩定嘅『紳士』要面對突如其來嘅轉變，又怕佢又會再次流落街頭，所以拒絕將『紳士』交畀呢位疑似主人。「呢位疑似主人只係口頭上講『紳士』係屬於佢，但冇提供任何證明，為咗『紳士』安全著想，我拒絕交出『紳士』。」

拒絕交出「紳士」之後，「傻媽」專頁開始湧現唔同鍵盤戰士嘅惡意攻擊，而一眾義工們亦不停受到電話騷擾及辱罵。雖然多個月來每日不停面對惡意抨擊，承受極大嘅心理壓力。但「傻媽」及一眾義工仍默默忍受，因為他們堅信拒絕交出「紳士」嘅決定係正確嘅。大量愛狗網民亦留言力撐「傻媽」，令「傻媽」有力量繼續堅持落去！