被棄路邊狗狗 毛髮嚴重打結　 獲義工救起 剃毛後成功被領養

月前，動保機構 Catherine's Puppies 義工救起一隻疑似被人遺棄喺路邊嘅狗狗（無晶片）。佢被發現喺街上遊蕩，全身毛髮嚴重打結，遠睇根本無法辨認出佢係一隻狗... 此外，Marley 被獸醫驗出膀胱有結石，尿液中有血跡，要等檢測結果出嚟先可以確定 Marley 嘅結石係咪可以通過飲食同藥物嚟治療，定還是需要做手術。

義工將狗狗帶返狗舍，經美容師剃毛及打理後，個樣完全唔同晒，變返一隻可愛嘅貴婦狗仔。義工為佢取名 Marley，並開始幫佢尋家。

Marley 喺狗舍等待咗大約三星期左右，佢就等到有緣人出現喇！領養人 Steven 表示：「Marley 係一隻非常可愛嘅狗狗… 當我帶佢去散步嘅時候，見到佢對所有小朋友同其他狗狗都好友善。佢真係好乖，而最重要嘅係，佢同我嘅小朋友，及本身養嘅狗狗都相處得非常之好，所以我認定佢就係我要搵嘅狗狗！」

兩日前，Marley 嘅檢查結果出咗，顯示佢嘅膀胱結石已經靠服用藥物而消失咗，所以唔需要做手術！對 Marley 及領養人一家嚟講真係一大喜訊！

感謝領養人一家對 Marley 嘅大愛，即使一早知道 Marley 膀胱有結石都選擇領養佢，對佢不離不棄！

授權轉載：  Catherine’s Puppies