名符其實嘅 “Sleepy Cat” 書店
位於美國加州嘅一間書店,店名叫做 “Sleepy Cat”。店主向外媒表示,呢個名並唔係貪得意改㗎,而係店入面真係有一隻 sleepy cat 喺度㗎!
同大家介紹返,呢隻 sleepy cat 叫 Lyla,係一隻純白色嘅貓,店主所養嘅。佢除咗非常鍾意喺櫥窗塊落地玻璃前面瞓覺之外,仲好鍾意瞓喺書上面午睡。
月前,一名愛貓網民路過此店,見 Lyla 喺正櫥窗個招牌下面瞓覺,同店名 “Sleepy Cat Books” 相映成趣,就用手機影低佢,再喺社交平台上面分享。帖文出咗之後,唔少來自其他美國州份嘅愛貓人士都慕名而來打卡,爭住同繼續瞓覺嘅 Lyla 合照。
原本平平無奇嘅一家小書店就因為一隻 sleepy cat 而成為咗愛貓人士嘅打卡景點喇!Lyla 仲時不時會收到進貢比佢嘅罐罐同零食添,但店主笑言:「瞓覺都有禮物收,我都好羨慕佢!」
相片來源:ig @sleepycatbooks