「放養」士多貓 身上傷口爛到見肉 老闆搽藥膏就算

喺貓奴嘅世界入面，總有唔少議題容易引起激烈討論甚至罵戰，應否放養就係其中一個議題。眼見好多街舖店主選擇利用貓主子幫佢哋看門口捉老鼠，但就無諗過要好好善待佢哋，甚至以「用完即棄」嘅心態去對待佢哋，實在令聞者傷心，聽者流淚。

日前，「毛守」義工就喺一間士多拯救咗一隻身上傷口有手掌咁大，爛到見肉嘅放養貓，呢隻貓叫做士啤（spare）。 老闆話，士啤今次個傷口咁嚴重，係因係畀流浪狗咬，今次都唔係第一次。一眾街坊都表示：「傷口咁大，睇見都覺得痛，但士多老闆只係話同佢搽啲藥膏就算。」 最後，街坊們終於睇唔過眼向「毛守」求助。義工立即將士啤送院， 但因為佢身上嘅傷口實在太大，遲一步需要做手術縫合。

另一樣聽到都令人覺得心酸嘅係，問士多老闆點解叫隻貓士啤，原因係佢已經養咗另外兩隻貓， 都係用嚟捉老鼠嘅， 但係擔心會走失或者畀狗咬死 ， 所以都係養多一隻做「士啤 」，可見士啤根本對士多老闆嚟講可有可無，老闆亦無真心當過佢係有血肉情感嘅動物，而只當佢係一件「用完即棄」工具...

要動物為你工作，最起碼要善待佢哋， 同對佢哋付出多一份愛和同理心。 雖然士啤唔係流浪貓， 但其實同流浪貓又有何分別？ 放養分分鐘比流浪的生活還悲慘！毛守義工嘆：「每日處理流浪動物個案已經超繁忙， 睇見主人對動物疏忽照顧，香港又未有動物福利法例， 感覺好無奈同失望。」

現世代科技先進，要捉老鼠其實有好多種方法，點解一定要利用到貓呢？呢個問題一日唔解決，一日都會有以上同類型嘅悲劇重複發生。希望政府有關當局可以嚴肅正視放養動物問題，避免更多無辜動物受害。

授權轉載：毛守救援