獨立義工缺資金醫貓 幸獲「白武士」接手個案

日前，一位好心人喺路邊見到一個紙盒，仲隱約聽到微弱嘅貓叫聲，原來紙盒入面有隻貓 B 喺度。 好心人立即 call 咗動保團體「春田貓貓托兒所」（下稱托兒所）去接貓。托兒所義工家慧表示：「隻貓紮紮跳，遲咗發現可能就走咗出馬路車死嫁喇！」

貓 B （義工改名為「小野菊」）目測 2-3 個月大，經檢查後發現其生殖器官異常，確診患有「無肛症」。由於無肛症貓貓必須要花時間特別照顧，加上小野菊只係一隻貓 B，開肛手術難度和風險都很高，日後就算小野菊手術成功，都有機會出現經常失禁嘅情況。

義工家慧向城城小編透露：「我哋曾經聯絡有醫治及照顧無肛貓貓嘅飼主了解過，發現要醫治無肛症，手術、覆診連雜項約 8 至 10 萬，而我哋呢個由獨立義工組成嘅動保團體，現時已經照顧緊約三十幾隻貓貓，實在無辦法照顧及醫治小野菊。我哋亦一向唔收捐款，向來拯救動物嘅費用都係我哋一班義工自資嘅。今次所需嘅手術費用咁龐大，我哋自問真係無能為力...小野菊嘅生命正在一秒一秒咁倒數，情況非常緊急，希望有大啲嘅動保機構能夠接收小野菊，助佢渡過難關。」

幸運地，當動保機構「沙律貓狗之家」知道呢個消息並了解咗小野菊嘅情況之後，決定幫托兒所接收小野菊。對於接手小野菊嘅個案，沙律媽不禁慨嘆：「係真嘅，大家都好吃力，獨立義工、我哋沙律家、香港其他大大小小收容所，大家都基本上爆滿，大家同樣花光心血、金錢、時間去幫助毛孩。所以托兒所無辦法幫到小野菊，我哋絕對明白同理解。面對被遺棄嘅無辜毛孩，我哋都只能夠咬實牙關，盡力去幫，盡力去救。毛孩無錯，錯嘅係繁殖毛孩嘅人、遺棄毛孩嘅人，係我哋人類欠毛孩嘅。」

在此，城城小編衷心感謝救起小野菊嘅有心人、幫助小野菊尋找「白武士」嘅「春田貓貓托兒所」及決定接收小野菊嘅「沙律貓狗之家」，多謝你哋尊重及善待生命，為拼命掙扎求存嘅毛孩們燃點生存嘅希望。

祝福小野菊手術成功，早日康復，盡快搵到一個溫暖嘅家！

授權轉載：春田貓貓托兒所