兩名疑棄養男子被車 cam 影到 容貌曝光 現全城緝兇

日前，動保機構「毛守救援」收到一名求助人來電，告知位於荃灣西嘅柴灣角公園，發現一隻牧羊狗側臥地上，不停喘氣，狀甚痛苦。求助人擔心狗狗捱唔住，即時聯絡「「毛守」 到場救援。

「毛守」義工透露：「當時目測狗狗仍然有呼吸，可能因為天氣炎熱，地面仍然有啲熱，所以小狗不停喘氣，未能站立，手腳有脫毛情況，似有皮膚病，右後腳背及左腳內側有大腫瘤，右耳窩內亦有腫瘤。從牙齒推測，狗狗應該已超過 14 歲。狗狗頸上繫有一條湖水藍色頸帶，由於狗隻不良於行，而且又喺偏僻嘅天橋底被發現，走失嘅機會近乎零，相信係被人刻意遺棄，晶片屬於寵物店，但未有主人登記。」

求助人及後嘗試喺唔同嘅動物群組發帖文查詢該狗來歷，幸好得到唔少街坊回應，仲意外地獲得有用嘅線索 －有路人聲稱日前喺荃灣麗城附近，目擊兩名男子抱住該年老牧羊狗，仲有車 cam 拍到兩名男子嘅樣貌。從相片中，兩名男子嘅出現時間、地點、狗隻外貌、拖帶及頸帶顏色，完全吻合。「毛守」義工表示：「我哋將唔同資訊整合，再同數名目擊者再三確認，已經可以肯定該牧羊狗係被人刻意遺棄。根據香港法例，遺棄動物屬於嚴重罪行，最高可被判罰款一萬元及監禁半年。」

城城小編在此呼籲，如有認識相中兩名男子嘅荃灣街坊，請與「毛守」聯絡，希望大家能夠合力彰顯公義，盡快能緝拿棄養者，為可憐嘅年老牧羊狗攞番個公道，同時，亦希望此舉能起到殺一儆百嘅作用，幫助減少棄養嘅個案。

授權轉載：毛守救援