棄養者刻意隱瞞兩貓身體狀況 險令義工所有貓賠上性命

日前，一直透過義賣魚蛋同雞煲嚟幫助流浪貓貓嘅小店「我要辣魚蛋」負責人心田收到一位女士喺 IG 求助，話想幫兩隻只得兩個多月大嘅英短兄弟 BB 另覓主人。該女士報稱因為家中有突發事情發生，需要立刻請人幫忙帶走兩隻貓 B。女士更聲稱兩隻貓 B 是來自自家繁殖，但健康完全無問題。當時心田一心只諗住救貓，希望接貓後為牠們做好檢查，就可以盡快幫佢哋搵個幸福嘅家。

但當心田接收咗兩隻貓咪，睇到貓咪嘅情況之後，佢開始非常擔憂：「其中一隻貓 B 屁股仍黐住糞便， 眼神唔太精神。再經超級奶媽睇過後，決定要立即衝診所急診，結果兩隻都證實有貓瘟。當想到有可能全舖嘅貓會賠上命，我望住佢哋驚到喊。今次衰易心軟，太易信人... 有樣野仲嬲，以為嗰位女士自己親手帶兩隻貓嚟，原來佢就咁 call 車掟兩隻貓上車送嚟。你屋企人有事就係生命，貓貓就唔係生命嗎？」

兩貓 B 現正在留院。「我要辣魚蛋」舖頭亦已進行消毒大清潔。心田呼籲大家：「家中有貓或成日接觸貓貓嘅人暫時唔好入嚟舖頭住，待隔離安全期過咗先。如訂購雞煲請於門口交收穩陣啲！保佑全舖貓要無事。」

及後「我要辣魚蛋」將會義賣雞煲及接受捐助，所得嘅款項都會用嚟資助呢兩隻貓 B 嘅醫療費㗎，希望有心人能夠多多支持！

資料來源：我要辣魚蛋