主人因狗狗經常吠叫要求獸醫將其「安樂死」

日前，英國北約克郡一個動物救援中心嘅創辦人 Lucie 收到一位狗主嘅求助電話。狗主話自己隻狗 Markus 因為經常向住途人、車輛及其他狗隻吠叫而令佢感到非常困擾，所以想將 Markus 送去 Lucie 嘅動物救援中心，將佢棄養。但當時因中心位置嚴重爆滿，冇多餘位置可以安置 Markus，Lucie 只好拒絕接收 Markus。

及後，Lucie 收到一位相熟嘅獸醫來電，獸醫講佢知有位狗主隻狗因為經常吠叫，所以想叫佢將狗「安樂死」。獸醫拒絕狗主要求，並立即致電 Lucie 希望她能暫時接收該狗，以免該狗主再尋找其他獸醫將佢「安樂死」。Lucie 細問之下，先發現被帶去獸醫度「安樂死」嘅狗狗正正係早上求助電話所提到嘅 Markus。

Lucie 覺得同 Markus 好有緣，於是決定將 Markus 帶返救援中心。佢希望 Markus 經過行為訓練後，能夠盡快搵到溫暖嘅家！Lucie 藉此想再三提醒有意養狗嘅人：「希望有意養狗嘅人喺決定養狗之前，應先深入了解飼養狗隻嘅責任同了解清楚狗嘅習性。狗狗帶返屋企之後，你必須要畀時間佢適應新環境同安定落嚟。而以 Markus 為例，佢絕對冇必要被安樂死。佢只係需要時間適應新環境，同做適當嘅行為訓練。」