急需籌募貓舍過百位貓住客 生活醫療經費

近月，動保組織「浪貓薈」收到非常多關於收地而棄養、放養及浪貓嘅求助。義工無奈地表示：「奈何之前屏山同錦田收地，我哋已經救咗接近 90 隻貓，我哋各項資源已非常緊拙，加上今年可能真係經濟都唔係咁好，每個月收到嘅捐款其實唔多，現時銀行存款已經不足以支撐本星期嘅日常開支，更遑論要負擔過百隻貓住客嘅醫療費用... 加上呢幾年，我哋兩間貓舍都即將面臨收地，收地確實時間雖然未知，但附近村民，包括我哋貓舍都已經收到律師信要求我哋搬走，估計會係喺呢兩三年內會發生嘅事，所以我哋都要預先為貓舍嘅貓住客們好好打算...」

義工補充，現時佢哋兩個貓舍分別喺橫洲以及東成里。兩貓舍附近仍有唔少浪浪，例如近排發現有貓媽媽剛生產完，依家居住喺垃圾站，每日依靠村民掉出來嘅廚餘為生，因此義工堅持每日要山長水遠去送飯畀佢食；另外喺東成里，義工救咗一隻叫 Queen 嘅浪貓，不過佢冇幾耐就因為患貓傳染性腹膜炎 (FIP) 而喺貓舍離開咗；義工再喺同一地方救起咗一隻叫 Circle 嘅貓媽媽，佢所生嘅四個仔女全部都有眼疾問題。可見，要救嘅浪貓源源不絕，但義工又唔忍心見死不救，所以仍硬住頭皮將貓咪救咗返貓舍先再諗辦法籌募經費。

「浪貓薈」並非政府撥款嘅受惠機構，亦從來冇收過政府一分一毫嘅資助，每月只靠善心人嘅捐款支持。此刻「浪貓薈」實在非常需要大家的支持，令被救嘅貓咪喺等待到領養家庭出現前都能夠食得飽，同有地方好好休息養傷！

在此，城城小編呼籲，希望大家有錢出錢有力出力，幫助「浪貓薈」兩間貓舍過百位貓住客，等貓舍可以繼續走落去！有意捐款，可直接 pm 「浪貓薈」，感謝！

授權轉載：浪貓薈