與「單身」狗來一場快閃約會！

8 月 26 日（星期六）係「國際狗狗日」，呢個節日嘅原意係希望讓大眾了解救助流浪及受虐狗嘅重要性。藉住呢個咁特別嘅日子，香港愛護動物協會 (SPCA) 將舉辦一場名為「狗狗脫單領養日」嘅活動，為「單身」唐狗尋找永遠嘅人類伴侶，等佢哋可以盡快脫單！除咗已喺領養部嘅動物外，因狗舍空間不足而仍未能轉往領養部嘅狗狗屆時都會現身同大家見面㗎！

愛協表示，目前狗隻領養中心飽和嘅情況十分嚴峻。過去數月狗狗領養數字持續下降，由去年12 月剛開關時嘅 23 隻，降至今年 7 月份嘅 12 隻，5 月份時更曾跌至單位數 8 隻。但愛協狗隻領養中心現正尋家或快將尋家嘅狗狗就有超過 100 隻之多，大部分為唐狗。

因此，愛協希望透過今次嘅活動，除咗幫一班「單身」狗盡快脫單之外，亦希望大眾可以親身接觸唐狗，了解其實唐狗同其他品種一樣，同樣親切友善，能夠成為人類最忠誠嘅好朋友，盼大眾能夠慢慢放低對唐狗嘅成見，從而增加佢哋被領養嘅機會。

「狗狗脫單領養日」詳情：

日期：8 月 26 日（星期六）

時間：下午 2 時至 5 時

地點：愛協灣仔中心（香港灣仔運盛街 5 號）

登記：免費入場，無需登記