唐狗被領養一日後 因未識認屋內環境不停吠 被緊急送走

呢隻叫「忌廉伯」嘅 12 歲唐狗係一隻有晶片嘅流浪狗，有心絲蟲、貧血，腎有問題。流浪時，「忌廉伯」被人類同浪狗打到周身傷痕，及後有好心人將佢領養咗返屋企，但可能因為「忌廉伯」已經流浪太耐，一時未適應室內環境嘅關係，「忌廉伯」非常驚同不安，所以去到領養人屋企之後就不停吠，亦因為咁，領養人決定將「忌廉伯」緊急送走，臨時將佢送到去托媽屋企。

托媽無奈地表示，「忌廉伯」吠係因為佢流浪得太耐，而佢亦要喺短短兩三日由大圍狗場去到領養人東涌屋企，再去屯門暫托，突然唔習慣，感覺不安，對人同狗嚟講都好正常。「相信佢只係未習慣屋入面嘅環境，想出返去外面嘅世界，同埋其實佢吠出聲之前會先嗯幾下，再細細聲嗚幾句，而佢係對住個大門口先會咁做，所以表示佢對門外面嘅聲音特別敏感。浪咗咁耐先入屋，真係要比多啲時間佢適應嫁㗎！」

「忌廉伯」去到托媽屋企嗰晚，托媽足足訓示咗佢一個鐘，又開晒啲房門同佢一齊瞓地下，等佢冇咁驚。嗰晚，「忌廉伯」都即刻好乖仔自己瞓教唔再吠。

感謝托媽畀「忌廉伯」一個暫住嘅地方，同窩心嘅照顧！希望「忌廉伯」能夠早日遇上包容愛護佢嘅好主人！

資料來源： fb @兩母子