主人貪新忘舊 失寵貴婦狗仔急尋暫托

呢隻十歲嘅貴婦狗仔叫「超仔」。佢曾經擁有舒適嘅屋企，同一個疼愛佢嘅主人。主人以前經常會帶佢去街街，一齊享受下午茶，而且每日都會同佢去海旁散步，每晚都同佢一齊瞓。 

直至有一日，主人帶咗一隻新嘅貴婦狗囡囡返屋企之後，主人帶「超仔」出街嘅次數就越來越少，大部分時間主人都係帶新狗囡囡出街。「超仔」嘗試主動同主人建立多啲交流同互動，但並唔成功。主人對「超仔」嘅興趣越來越少，對佢越來越冷淡... 最近，「超仔」主人更同朋友表示，覺得照顧「超仔」好辛苦，唔想再要佢...

相信「超仔」從冇諗過自己會變成一隻無家可歸，可能要喺狗場終老嘅狗狗。而家已經 10 歲嘅「超仔」已經無法奢望有一個新主人突然降臨，佢只希望有人可以收留佢，畀佢一個暫時安老嘅庇護所。

有意暫托或領養「超仔」溫馨提示：

公屋 / 公司 / 貨倉 / 車場暫托不考慮。

「超仔」非常健康，但有少爺脾氣，需要有人長期陪伴。

需早晚帶「超仔」散步及去廁所。

暫托期間如有醫療費用會由義工負責。

資料來源： fb @Joo Joo Lau