芬蘭超市增設「狗狗手推車」 方便狗主帶狗進內購物

位於芬蘭坦佩雷 (Tampere) 嘅超市 Kesko 近日新增咗專為狗狗而設嘅「狗狗手推車」(Koirakärry)。

該超市負責人 Matilda Tistelgren 接受外媒訪問時表示：「其實呢個做法有唔少歐洲已經採用緊，但喺芬蘭就暫時未有，加上有見我哋呢區住咗好多有養狗嘅主人，所以我同合夥人就喺月前決定新增設狗狗手推車。其實我哋自己都有一隻金毛尋回犬，曾經試過有幾次，我哋帶狗狗一齊出去慢跑，突然醒起有野要去超市買，但就礙於大部分超市都唔畀狗狗入，所以我哋只好將狗狗帶返屋企，再自行去超市，浪費咗唔少時間。嗰時，我哋就諗，如果超市能夠畀狗狗入，你話幾好呢？所以接手咗呢間超市之後，我哋就萌生咗增設狗狗手推車嘅念頭。」

「狗狗手推車」外型同一般超市手推車冇太大分別，只係底部有一張狗床墊，仲有一個用嚟扣住牽引繩及狗帶嘅夾。

Kesko 超市鼓勵主人將狗狗放入手推車，但較大型嘅狗狗，只要主人幫佢哋繫上狗帶，主人就可以拖住佢哋行超市。及後，負責人Matilda 希望可以為「狗狗手推車」加上可伸縮嘅小型斜坡，等坐喺車上嘅狗狗都可以隨意落車行走。 

資料來源：EuroNews