撞傷唐狗司機事後不顧而去至今仍未現身承擔責任

月前，城城小編報導過一隻喺西貢公路被車撞到嘅唐狗「妹妹」，涉事司機事後不顧而去。「妹妹」及後被義工救起，並將佢送咗去醫院。「妹妹」當時情況嚴重，肺部受損，有氣胸、腹水及左後腳脫臼。

現時「妹妹」尚未完全康復，仍在服用抗生素，左後腳須進行手術。術後會喺動保機構 Sai Kung Stray Friends Foundation (SKSFF) 中心療養，待康復後，義工希望幫「妹妹」尋家。

唔少熱心嘅愛狗人士得知「妹妹」被車 hit & run 之後均紛紛捐款資助「妹妹」嘅醫療及手術費。SKSFF義工表示：「至現時為止，我哋機構透過 Payme 收到超過共 120 筆捐款，總額約港幣 5 萬元。」

SKSFF 義工非常感謝一班愛狗人士對「妹妹」嘅關心同支持，同時佢哋亦對今次事件表示憤慨：「今次事件嘅涉事司機，由始至終並冇現身，亦冇選擇以任何方式承擔責任！我哋對此感到極之憤怒！出事後，網上媒體鋪天蓋地報導事件，涉事司機冇諗過負返一丁點責任，『妹妹』嘅所有醫療及手術費用最後居然要由公眾同我哋機構埋單！我哋只希望涉事司機有返少少良知、同情心同責任心。唔行出嚟承責，都至少用佢自己嘅方式去承擔返『妹妹』嘅手術費用！」