南韓擬最快今年年底通過立法 禁止食用及買賣狗肉

喺亞洲，每年有大約 3,000 萬隻狗因為狗肉需求而被殺害，中國、印尼、越南、柬埔寨、韓國都係狗肉消費大國，部分地區甚至將「食狗肉」視為傳統之一。隨住國際反對聲浪有增無減、動保團體多年施壓，加上新冠肺炎疫情影響，近年部分國家嘅地方政府做出勇敢嘅改變，大力倡議禁食狗肉。

為咗改變長久以嚟食狗肉嘅文化，南韓執政黨及主要在野黨國會議員合力推動立法禁止食狗肉，以回應全球要求停止食用狗肉嘅訴求。

日前 (14日) 喺南韓國會上，主要在野黨「共同民主黨」提出，喺今年 12 月 9 日例行會期結束前，通過立法禁止食用及買賣狗肉。呢項立法行動獲得總統尹錫悅嘅保守派執政黨「國民力量黨」支持，因此雖然有養殖業者大力反對，但掌握嘅票數足以通過法案。

「國際人道協會（HSI）」南韓分會動保運動人士指出，截至今年為止，南韓仍有 1156 個狗肉農場，飼養 52 萬隻狗專門提供食用。南韓將於明年 4 月舉行國會選舉，《韓國時報》報導，兩大黨可能藉由推動立法禁食狗肉，以爭取 20 至 30 歲游離選民嘅支持。

資料來源 : LTN