日前老唐狗幸運從被暫托變被領養 今晨因病需安樂死赴彩虹橋

月初，城城小編報導過一隻黑雨前，獨立義工自行上山救起嘅老狗「小黑」。義工見到「小黑」時，發現佢肚部異常漲大，立即帶咗佢去 24 小時醫院。「小黑」喺醫院抽咗腹水、做咗檢查、化驗、住咗一晚醫院。出院後，「小黑」由一位托媽「兩母子」照顧。及後，托媽表示「小黑」非常乖巧，與家中其他狗狗都相處得非常好，加上「小黑」已 15 歲，年事已高，出領養到有一定難度。因此，托媽與家人商討一輪之後決定由暫托變領養，並為「小黑」改名為「黑妹」。

及至今早，城城小編收到領養人嘅壞消息：「黑妹豬安樂走咗喇...因為佢已經食唔到嘢，飲唔到水，後腳無力，不停失禁。Sorry all！最後都幫唔到佢...一切都嚟得太突然...」

「黑妹」流浪嘅時候已經一直有個好大嘅腫瘤，但因為太老，所以領養人都無辦法幫「黑妹」安排做手術；腹水都係因為個瘤而產生，所以醫生都冇計可施。

領養人對「黑妹」嘅離開，心感自責：「『黑妹」琴晚情況突然變差，今早同佢即刻睇醫生，醫生建議幫佢『安樂』，等佢舒服啲走。佢已經轉咗幾次藥都止唔到嘔... 最後我都幫唔到黑妹，心好難過，覺得有啲好似親手送走佢咁，但睇住佢愈來愈辛苦真係好慘。我都無諗過原來咁難受，剛才喺診所爆喊...真係會問自己咁揀係咪啱...」

授權轉載：兩母子