動保組織 AREbyNPV 辦領養日 鼓勵關注唐狗 推動「領養代替購買」

【#領養日】適逢世界動物日，動保組織 AREbyNPV 與 Pettoland 於今個星期日 (10 月 15 日) 共同舉辦狗狗領養日！屆時將有 11 隻唐狗出席，有活潑可愛嘅狗 B，亦有親人親狗嘅成犬，絕對適合新手家庭！當日下午 2 時至 5 時，現場將有「Q 版狗狗似顏繪工作坊」，由@huhuhehuhuhe 導師指導，教主人以蠟筆畫出狗狗可愛嘅樣子！工作坊費用全免，只需 Follow IG @huhuhehuhuhe 及 @arebynpv 就可以參加啦！名額有限，先到先得！

將出席領養日狗狗嘅背景資料 －

二妹︰二妹由細到大都喺山上流浪，早前被發現身上有烏蠅蟲傷口，懷疑係俾人襲擊而造成。當時二妹除咗有烏蠅蟲傷口外，更驗出有心絲蟲，需要幾個月嘅治療。不過因為搵唔到暫托，熱心市民只好自資將二妹安放喺收費嘅狗場休養，一個月要幾千蚊，負擔非常重。二妹年紀漸大，而且性格溫馴，希望二妹可以入屋安享晚年，唔駛再喺山上受苦。

Sky︰喺山上流浪，被義工救起後，輾轉之下去到一位好心家庭暫住，一住就住咗 3 年。但後來因暫托家庭某啲感情原因，Sky 差啲就被拋棄，幸得現時暫托義工自費將 Sky 留喺學校，畀 Sky 重新學習禮儀。

Olga ＆ Orah︰一個婆婆執吓執吓，屋企達二十幾隻狗，後來搞唔掂，所以急需要人拎走啲狗。

Orbit︰原為青衣倉狗，約 2 個月大時被義工救起，但一直未搵到屋企。

吉仔︰主人因僭建嘅屋企下星期會被拆，所以冇能力再養。

Zula︰喺打風前 2 個星期，Zula 無啦啦入咗某間公司。佢冇攻擊性，不過見人就走，點知早排又返咗去公司，就再唔願走了，於是義工們決定為Zula 尋家。

蛋黃︰寮屋主人長期放喺走廊養，從不放出街行，經義工勸喻決定出領養。

花菇︰被人退過兩次領養，但其實無行為問題，正常食、正常識大小二便。

小黑咪、牛奶仔︰小黑咪同牛奶仔呢兩兄妹喺黑色暴雨之後一日出世。媽媽一胎 6 個 BB ，全部平安出世。福大命大，當中 4 個 BB 已搵到領養家庭，只剩低黑白花紋嘅牛奶仔同經常皺眉頭嘅小黑咪無人問津。牛奶仔係一個強壯嘅哥哥，小黑咪係比較怕羞嘅妹妹。佢哋都值得擁有一個家，希望兩兄妹比媽媽好運，能夠搵到主人愛錫。

【ArebyNPV x PettoLand 狗狗領養日】

日期：2023 年 10 月 15 日 (星期日)

時間：13:00-18:00

地址：青山道 201 號青薈 1 樓全層

活動內容：狗狗領養日 + Q版狗狗似顏繪工作坊

領養須知：

領養者必須年滿 21 歲或以上。

若未滿 21 歲者，需由同住的父母或監護人代為申請。

不接受放養、店舖飼養。

暫托義工會進行家訪。

更多領養申請詳情，請於當天向在場義工了解。