貓 B 被車嚴重撞傷急躲坑渠內義工到場救援術後成功保命

日前，動保組織「貓の地帶」義工收到一個求助電話，求助人表示喺荃灣橫龍街有一隻貓 B 喺朝早 11 點左右被車嚴重撞到後腿，喺受咗傷同極度驚慌下，貓 B 逃入坑渠內躲避。

義工得知事件後，立即前往現場救援。到達現場後，義工發現貓 B 躲藏喺極端污糟，佈滿糞便，垃圾及食物殘渣嘅污水坑渠內，只露出上半身，動彈不得。

義工表示：「因為現場環境問題，救唔到貓 B ，已即刻致電消防處求助，到最後由愛協督察及消防員合作之下救起咗可憐嘅貓 B，並隨即將貓 B 送到 NPV 醫院進行搶救。經當值醫生詳細檢查及照 X-Ray，證實貓 B 脊椎骨嚴重碎裂，所以引致雙腳及膀胱完全無反應。如果唔立即進行大手術，貓 B 到最後會神經被壓腫脹致死。好感恩到最後貓 B 手術成功，但未來仍然係危險期，佢嘅康復期仍然好漫長...」

義工為貓 B 改名為「小龍」。「小龍康復之路會好漫長，希望大家可以幫幫小龍！本人係獨立義工，手上早前救返嚟嘅兩隻浪浪，已經用咗唔少醫療費，而家又救起咗小龍，小龍嘅醫療費真係好需要大家嘅幫忙。雖然佢嘅手術費有浪浪基金幫忙，但救起佢後睇急症，照 MRI 及 CT 嘅費用都係本人自付... 衷心希望大家能伸出援手，幫幫可憐嘅小龍，幫佢籌募睇急症，照 MRI 及 CT 嘅醫療費用。」