主人誤以為貓咪百厭 專登亂痾屎屎而棄養

呢隻叫「米米」嘅貓貓被前主人遺棄，原因係佢喺砂盤以外嘅地方亂痾屎屎，又同家中其他貓相處唔到，覺得佢有行為問題，無法繼續照顧佢。義工表示：「其實『米米』係有腸胃問題，屎屎都係軟爛嘅，呢頭食完嘢嗰頭就會痾，肚仔唔舒服嘅佢會因為跑唔切去廁所而唔小心咇咗少少出嚟，或者因為太稀痴住 patpat，到「米米」坐低時就會印咗喺床仔、地下、毛巾。如果係個有責任心，真心錫佢嘅主人，點會分辨唔到貓貓係有行為問題定還是患病呢？」

義工帶咗「米米」睇醫生，醫生估計「米米」因為喺前屋企有情緒壓力而引致便便問題。佢建議著重幫「米米」養返好腸胃，「而家『米米』食緊抗生素療程，配合腸胃處方糧同益生菌，便便狀態未去到 100 分，但都慢慢成形，唔再係咖喱，希望完成療程後『米米』可以變返個食得瞓得痾得嘅健康 boy！」

另外，「米米」到中心時，義，工發現佢頸上有兩撻甩咗毛，大約係喺前屋企生活得唔開心有壓力，情緒影響到，以致佢過度理毛或脫毛，不過而家「米米」喺中心過得自由自在，舒服開心，脫毛位置逐漸生返毛毛出嚟喇。

「『米米』平日最大嘅嗜好就係霸住人類個大髀，一見到人類出現就痴腳求關注，要你幫佢 massage 唔准停，要由頭摸到面仔摸到肚腩仔，再拍 patpat 一千幾百下，『米米』大爺就會用煲水聲嚟表示滿意。手手會不停踩嚟回應你。冇人嘅時候佢會自得其樂，玩佢最心愛嘅魚魚逗貓棒，係個既親人可愛又能夠獨立嘅成熟美男子。」

如果你自問係個負責任嘅主人，樂意貢獻雙手為「米米」日日夜夜按摩，請聯絡「愛領養動物中心」。

資料來源：愛領養動物中心