前主人指兔兔「毛事」咬人 義工：「佢只係難耐身體痛楚先會咁做...」

呢隻兔兔叫「毛事」，只有半歲。當義工見到「毛事」時，發現佢左腳姿勢古怪，伸展時佢會痛，會大叫。除咗步姿有問題，「毛事」仲不斷圍圈行，義工懷疑佢盆骨出現問題。醫生為「毛事」診症後表示，「毛事」嘅情況罕見，係先天髖關節發育不全，左邊缺乏髖臼而令股骨頭不斷磨擦，情況就好似長期甩骹一樣，骨與骨之間嘅磨擦，令「毛事」相當痛。由於係先天問題，相信由「毛事」出世一刻起，佢已經開始痛。

前主人指「毛事」會咬人，相信「毛事」係因為痛而有咬人嘅行為，亦因為「毛事」反應十分激烈，需喺鎮靜情況下先可以照 X-Ray。姑娘指，當日照 X-Ray 按壓「毛事」時，雖然已經鎮靜，但佢仍然反抗，可想而知「毛事」有幾咁痛... 醫生補充，目前暫時未有先天髋關節發育不全嘅個案，參考常見於狗狗嘅個案，可以試將骰骨頭切走，配以術後嘅物理治療，但最後後腳亦有機會行唔到。

雖然「毛事」嘅情況，最簡單嘅方法就截肢，但「毛事」只有半歲，四隻腳一定比三隻腳好，兔舍希望能夠俾「毛事」一個機會，睇下有無辦法可以保住佢嘅左腳。

授權轉載：香港救兔之家