即睇 4 個狗狗表示焦慮嘅表現

大家平時生活感覺焦慮、有壓力時，好多人都會出現近乎無意識嘅焦慮現象，例如：咬指甲、抓皮膚、咬頭髮、抖腿或舔嘴唇等，呢啲都係常見嘅自我安撫行為。狗狗焦慮時，都會出現類似狀況，如果發現狗狗做以下呢 4 件事，就表示佢感覺不安，主人們要留意一下。

1 不停聞地板

狗狗雖然平時都會經常聞地板，但如果聞地板嘅次數太頻繁，有呢個可能係狗狗焦慮嘅表現！

狗狗聞地板除咗想探索新事物之外，佢哋面對陌生人或令佢哋感覺害怕嘅對象時，想要令對方同自己冷靜落嚟時都可能會咁做。

2 不停舔鼻

食飽感覺滿足嘅時候，狗狗一般會舔鼻，但係喺狗狗焦慮嘅時候，原來一樣會舔鼻。呢個動作喺狗狗肢體語言入面有「安撫」嘅意思。當狗狗睇到主人嬲同憤怒嘅時候，就好可能會做出呢個動作想令主人快啲消氣。

3 不停打喊露

狗狗打喊露唔一定想瞓覺，有可能係表示焦慮。打喊露係狗狗表達「有壓力」嘅一個普遍動作，呢個行為類似人類嘅「深呼吸」，藉此舒緩焦慮同壓力。

4 擰歪面唔望人

狗狗擰歪面唔望人，並唔係真係唔想理人，可能只係因為佢太焦慮，尤其面對陌生人時。當陌生人突然衝過去抱狗狗，狗狗就有可能被嚇到而擰歪面唔望人，迴避陌生人嘅眼神。

資料來源：maoup