狗狗 5 大睡姿的秘密

狗狗唔同嘅睡姿都表達唔同意思㗎！快啲睇吓你狗狗嘅睡姿正在向你表達緊乜嘢訊息啦！

1 側瞓
呢個係狗狗最常見嘅睡姿，表示對周邊環境感覺非常安心，亦表示狗狗瞓得好舒服！對主人是好信任，對而家嘅生活感到非常滿足。

2 捲曲
喺天氣寒冷嘅冬天，狗狗好多時都會捲曲身體瞓覺嚟保暖。平常日子，如果狗狗都捲曲身體瞓，表示佢對周邊環境未能夠完全放心，未能完全信任你，需要更多安全感。你或者需要平日多加同狗狗培養感情，例如多抱抱狗狗，溫柔地幫佢梳梳毛。

3 趴睡

狗狗趴睡表示佢未完全放鬆，肌肉仍然喺緊繃嘅狀態。除此之外，呢個睡姿亦可能表示狗狗已經準備好隨時出去玩，係一隻貪玩嘅狗狗。

4 大字形

四肢大字形攤開咁瞓，可能因為天氣熱，肚仔貼住地板比較涼，但亦有可能代表狗狗精力充沛，容易激動興奮。這種睡姿對於主人嘅呼喚，可以立即起身跑到主人身邊，表示佢係一隻比較外向嘅狗狗。

5 四腳朝天

狗狗四腳朝天咁瞓有可能係因為太熱，希望快啲散熱。此外，呢個睡姿亦代表佢對主人、環境 100% 信任，完全唔擔心被攻擊。佢極有自信心，係一隻超級樂天嘅狗狗。

資料來源：Dogs Behavior