三貓 B 疑被黑心繁殖場棄置草叢 一死兩倖存

日前，有好心求助喺係掃管笏放狗其間，發現兩隻狀態非常虛弱嘅貓貓喺馬路中間，於是立即落車救起。同時，佢聽到草叢堆仲有貓叫聲，於是即刻前往搜救，佢喺草叢堆中再發現多一隻金色貓貓，佢好虛弱咁攤喺度唔識郁，情況好差。義工表示非常感謝求助人，就算趕時間，都即時由掃管笏帶貓貓去都基地，十分鐘已經順利接收三隻貓貓。

金色貓貓情況十分危急，有貧血表徵，呼吸十分虛弱，唔能夠自行飲食；白色貓貓下身生殖位置不斷有分泌物及血水流出，懷疑子宮畜膿或有咗，肯自行進食，仲即時食晒一個營養罐；虎紋色貓 B 眼部感染情況嚴重，十分瘦弱，狂飲水，飲咗一大碗水都唔夠。三隻貓都體溫過低、貧血、白血球唔正常...

金色貓貓，改名「小金」，約 8 個月大，小金喺到達醫院後，嘔咗一攤血，呼吸咗幾下之後，已經離開咗.. X-Ray 見到小金個肺花晒，有嚴重肺炎，引致敗血症！ 肝指數超高，小金餓咗好耐，最少一個星期以上完全無食過嘢。

白色貓貓，改名「小白」，體溫過低、白血球高、貧血、肝指數高、確診子宮畜膿，要緊急做手術，需要留院及做種菌。

虎紋貓貓，改名「老虎仔」，約 4 個月大，體溫 35.2°c，貧血、營養不良、嚴重 cat flu，已打抗生素，需每日打皮下水，需服抗病毒藥及抗生素及保溫。

「小白」同「老虎仔」嘅復康旅程仍然非常漫長，如希望了解貓貓更多，或有意協助支援兩貓日後龐大嘅醫療及救援經費，請直接 pm 兔兔基地，感謝！

授權轉載：兔兔基地