新年狗狗飲食禁忌 危險食物隨時致命

第一類：風險較低但冇益

（一）各式炸物

新年好多人屋企必備角仔、笑口棗等等，呢類油炸點心「高糖、高油、高脂」，狗狗食咗好容易會消化不良同肚瀉，就算係人類都唔應該食太多。

（二）各式糕點

年糕、馬蹄糕、棗茸糕等等用糯米或馬蹄粉等做成，容易引致狗狗腸胃不適，而且呢類糕點都會加入大量嘅糖，不類狗狗健康；而鹹糕例如蘿蔔或者芋頭糕對狗狗嚟講實在非常油膩，亦都加入大量調味品，非常唔適合畀狗狗食。

第二類：風險稍高影響大

（一）各式肉乾

各式牛肉乾、豬肉乾基本上都高鹽而且好多調味料，對於最鍾意食肉嘅狗狗嚟講吸引非常大，但係狗狗唔單止會肚瀉，嚴重起上嚟更會有損腎功能，寵主們一定要小心放好，唔好畀狗狗偷食

（二）各式堅果、瓜子

堅果容易對於狗狗嚟講好難消化，如果狗狗食咗夏威夷果仁 (macadamia nuts) 仲會有機會中毒，非常危險，最好所有堅果都唔好畀狗狗食。

第三類：風險極高可致死

（一）      乾果類

乾果糖份超高，對狗狗身體非常冇益，而且乾果中非常常見嘅提子乾對狗狗嚟講同毒藥冇乜分別，如果食咗可能會引起肝腎衰竭，有機會令狗狗死亡

（二）      朱古力

朱古力基本上係新年必定會出現嘅食品，狗狗如果誤食嘅話後果可以致命，主人記得記得要好好存放，千祈唔好畀狗狗有機會食到呀！