越南屠狗場場主轉行 四十多隻狗逃過一劫

越南太原省屠狗場嘅場主喬先生決定轉行，佢將四十幾隻狗交到動物收容所，其中包括一窩只有 10 日大嘅狗 B。據法新社報道，估計越南每年約有 500 萬隻狗被宰殺，數量僅次於中國。隨住社會越趨富裕，養狗當寵物嘅人越來越多，大眾對食狗肉嘅睇法正慢慢改變。

過去七年一直從事屠狗工作嘅喬先生，決定轉行後，將場內 44 隻狗主動交去動物收容所，由收容所照顧佢哋，並幫佢哋尋找收養人。39 歲嘅喬先生轉行從事廢金屬貿易同化肥銷售。佢向法新社剖白：「過去七年，我屠宰咗多達兩萬隻狗，其中大部分係由養小狗以貼補收入嘅農村家庭賣俾我嘅。而家回想過去殺死佢哋，我心感難過...」

多年嚟設法結束全球狗肉貿易嘅國際人道協會 (HSI) 指，喺越南被殺嘅狗大多係偷返嚟嘅寵物或流浪狗，呢啲狗係用毒餌、電擊槍從街上捉返嚟嘅，仲有一啲係從柬埔寨等周邊國家進口嘅。捉返嚟嘅小狗一般都會被困喺環境非常惡劣嘅籠入面幾星期，甚至幾個月，之後就會被屠宰出售。

資料來源：法新社