伊斯坦堡機場首設治療犬助旅客舒緩緊張與焦慮

相信唔少人上飛機前都會莫名感到焦慮、緊張，神經緊繃令人好難舒適安心。有見及此，土耳其伊斯坦堡機場上月推出咗「治療犬計劃」，5 隻經過專門訓練嘅狗狗會常駐機場「上班」，佢哋主要嘅職責係同機場旅客互動，幫助旅客舒緩焦慮同緊張。

是次係伊斯坦堡機場首度推出「治療犬計劃」，5 隻狗狗均經過長達 1 年時間嘅特殊訓練先喺機場返工，不論見到大人或者係小朋友，都能夠處變不驚。每隻狗狗喺機場「上班」時，都會配對一位專業訓練師，佢哋會配合訓練師嘅步伐，隨時停低腳步，同旅客互動。

據外媒稱引述，5 位「優秀員工」走馬上任 1 個月，廣受好評。因此，機場計劃未來將治療犬增加至 10 隻，讓更多旅客能夠感受放鬆嘅旅遊體驗。