可憐龜龜 被第一任領養人因「鬼上身」為由棄養 再被第二任領養人「放生」公園水池

上年，「香港棄龜關注組」（下稱「關注組」）接收咗一隻棄龜，那時候龜龜主人遺棄佢的原因... 係龜龜其中一隻耳有個大腫瘤，飼主不停同佢囡囡講龜係「鬼上身」，會為屋企「帶來厄運」。飼主囡囡好驚，見到龜龜就喊，飼主丈夫只好求助「關注組」接走龜龜。

「呢家人養咗龜龜一年都無幫佢改名，於是我幫佢改名『惡魔仔』。自接咗『惡魔仔』返嚟之後，我帶佢去做手術同接受一連串治療，後來終於康復，變返一隻健康又活潑嘅可愛龜龜，及後更為佢尋找到新領養人。新領養人承諾會好好愛惜佢，照顧佢一生一世…」

自從新主人領養「惡魔仔」後，「關注組」義工們曾聯絡佢，只希望佢能夠提供「惡魔仔」嘅近照，但佢並冇提供。義工一直好擔心，直至日前，新主人終於回覆，佢竟然話已將「惡魔仔」遺棄公園水池，原因係家人唔鍾意佢，所以一個月前已經將佢「放生」。義工憤慨：「放生... 即係由佢一隻小小嘅烏龜喺冇食物嘅水池裡面自生自滅！鬼唔可怕！妖怪唔可怕！惡魔唔可怕！人類先最可怕！此刻萬般感受在心頭！我剛去咗『惡魔仔』被『放生』嘅嗰個水池，但已經搵唔到佢嘅踪影... 生死未卜，只能默默祈求『惡魔仔』平安...」

「當然我哋明白已事隔個多月，搵得返『惡魔仔』嘅機會等同大海撈針。我哋多番要求當事人陪同我哋去到正確位置，盡力一齊搵番『惡魔仔』。惟答覆只係一直拖延，一開始答應放工去搵，之後再話今日唔得閒，聽日再睇情況諸如此類，之後甚至封鎖我哋，完全同佢失去聯絡...呢位當事人，希望你能夠反省自己嘅行為。『惡魔仔』係因病而被主人棄養，我哋義工花上時間同心機照顧至康復。到頭來竟然被你親手將佢送上絕路！自知做錯但就無膽量承認錯誤及負責，試問你良心過得去嗎？我哋痛恨一切不負責任傷害動物嘅行為。傷害動物嘅人，我哋堅信終有一日會自招惡果！其實放生動物去康文署轄下水池有機會違反遊樂場地規例，按法例需判處罰款。我哋會密切跟進事件，唔排除作進一步行動，包括民事索償或向有關執法部門舉報。」

資料來源：香港棄龜關注組