浪貓 4 年來風雨不改返校「聽課」 獲大學頒贈榮譽博士證書

一隻叫 Max 嘅流浪貓，日前獲美國佛蒙特州立大學 (Vermont State University) 頒贈榮譽博士學位！

佛蒙特州立大學 Facebook 出 PO， Max 連續 4 年來每日都風雨不改咁返學校「聽課」，出席率之高甚至贏過唔少同學，所以大學特別頒發具有諧音梗趣味嘅「doctor of litter-ature」（註：litter 有貓砂之意）榮譽博士學位證書畀 Max。

講到 Max 嘅身世， Max 其實係一隻流浪貓，後來被住喺校園附近嘅好心人 Ashley 收養咗。不過即使有一個溫暖嘅家，Max 仍然鍾意日日走入校園「聽課」，甚至仲會喺研究生及院長辦公室出現同大家 social ，因此佢相當受校內師生歡迎。

佛蒙特州立大學於畢業典禮當日宣佈 Max 獲頒榮譽博士學位，然而 Max 非常有性格，決定唔出席畢業典禮，由飼主 Ashley 到現場代為領取證書。

資料來源：Vermont State University