主人遲還書 可以喵星人相片代替罰款？

美國麻省一個公立圖書館（Worcester Public Library），於月前推出一項非常有趣嘅企劃，企劃名為「貓咪換取罰款特赦」（Felines for Fee Forgiveness）－任何遲還書、遺失或損壞咗圖書嘅讀者，只需要交出一張貓咪嘅相片，圖書館館長就會一笑冺恩仇，重啟讀者嘅帳戶，恢復佢哋嘅借閱權，能夠繼續借書。圖書館亦特別為企劃專登喺主館設立咗一道「貓牆」（Cat Wall），以展示一班代主人「還債」嘅貓咪相片。

如果冇養貓點算？圖書館執行董事 Jason Homer 表示：「曾經有個 7 歲男孩一直冇歸還《內褲隊長》（Captain Underpants）呢本圖書，但佢屋企冇養貓，於是我哋即場拎出紙筆俾佢喺畫紙上面畫一隻貓，讓佢以貓畫抵債。」

企劃背後嘅目的其實係想鼓勵人多啲去圖書館借閱圖書，亦唔想遲還書、遺失或損壞咗圖書嘅讀者為咗逃避罰款而避免再去圖書館。Homer 估唔到，企劃推出短短幾日，就引嚟熱烈嘅迴響，已經約有 400 人去到圖書館「還債」：「往後我哋可能會將企劃擴展至其他小動物上再試試。」

資料來源：Worcester Public Library