兩歲貓女困尺半籠被棄街角 籠內只有剩食及染尿爛布

昨晚 11 時許，義工聯絡流浪貓月子中心暨收容所「沙肥貓」，問佢哋可否收留一隻連籠被棄街角嘅貓貓，相中可見籠入面只剩下倒瀉嘅食物同一堆染尿嘅爛布。「只係思考咗半秒 ，我同拍檔們就決定收留佢。輾轉知道前主人養咗貓貓兩年，由於貓貓會夜叫影響前主人休息 ，加上本身住劏房生活條景不佳 ，故此決定棄養 。 」

「沙肥貓」其後出 PO 致前主人 ： 「其實棄養有好多方法，相信拎落街 『放生 』一定唔係最好嘅方法。好彩你都仲識得啲有常識嘅朋友，叫你困住佢棄喺街上容易被人發現 。貓貓除咗受驚過度之外 ，都叫肥肥白白 ，而且仲絕咗育，相信你都曾經有愛過佢吧 ！唔理咩原因 ，而家唔愛了，都係嗰句 ，可以不愛 ，但請不要傷害。我哋感謝你 『「放生 』咗佢，亦恭喜你解決咗個負擔。貓貓一定會活得比你更好！」

資料來源：沙肥貓