中亞牧羊 B 女極速尋家成功 義工感鼓舞
較早前，「浪貓薈」義工收到求助，有兩隻中亞牧羊犬 B（4 個月大）因為家中主人有 BB，所以冇辨法繼續照顧，其中男仔中亞牧羊已被領養，剩下嘅一隻女仔中亞牧羊（名「花花」）如冇人收養會被掉出街自生自滅。義工立即幫手出 PO 為「花花」尋家：「中亞牧羊犬屬大型犬，平均體重介乎 40 - 80 kg，需要活動範圍亦較大。請大家領養前，停一停，諗一諗，呢個係生命唔係玩具，動物亦有情緒，到新環境都需要時間適應。有意領養請 pm 了解更多。」
義工估唔到只係出咗 PO 好短時間，「花花」就以訊雷不及掩耳嘅速度搵到屋企喇！「感謝領養人唔介意 『花花 』有皮膚病同營養不良嘅問題，『花花 』後腳冇力，後腳行路較差，領養人很積極為 『花花 』尋求治療方法。 『花花 』到達新屋企當日，已經即刻反肚肚求摸摸、食骨骨、玩玩具，仲有新床仔瞓㖭！我哋義工都好羨慕『花花 』，領養家庭喺照顧狗狗方面經驗非常豐富，亦常帶狗遊山玩水，相信 『花花 』以後嘅日子都會過得好充實 ！ 」
感謝領養人大愛！祝「花花」身體健康！生活愉快！
資料來源：浪貓薈
