「浪喵站」聯同「毛守」Kent 哥開展 6 日 5 夜通宵救貓行動被困貓咪最終成功獲救

一隻貓咪由農曆新年開始，跌咗落屋簷，晚晚慘叫。「愛協」及消防嘗試過都救唔到佢。直至最近一星期，佢走咗入一間鋪嘅招牌後面，但畀招牌圍板圍住咗，叫天不應叫地不聞，如果再唔營救，必定兇多吉少！於是，動保組織「浪喵站」聯同「毛守救援」Kent 哥開始咗 6 日 5 夜嘅通宵救貓行動，最終將被困貓咪成功救出！

「浪喵站」特別出 PO 感謝 Kent 哥、裝修師傅、鋪頭租客及各界義工：「首先要感謝『毛守救援』Kent 哥！如果冇 Kent 哥根本唔會救到隻貓，隻貓亦都必死無疑。救呢隻貓需要超長梯先爬到上去救，而招牌後面係霉晒就嚟爛嘅木板，環境惡劣及危險。裡面有好多鐵枝同圈閘關係，好多畀貓匿得埋嘅地方，係十級難捉嘅地方，但 Kent 哥不辭勞苦，就算地方危險，天氣酷熱，加上有大量老鼠屎同曱甴，喺極惡臭嘅環境下，都諗盡方法，盡心盡力，做埋𠝹鐵工人，無私地去救呢隻貓。無言感激！除此之外，我哋要感謝裝修師傅！佢知道我哋要救貓，二話不說借長梯畀我地任用，知道我哋需要𠝹開招牌，一收工即刻嚟幫手𠝹，仲幫忙搵隻貓嘅去向，十分感激！鋪頭租客亦都好好，知道有貓困喺上面，就算可能影響到佢哋生意嘅情況下，都畀我哋爬上爬落救隻貓，更畀我地拆佢招牌（少部分）去搵隻貓，最後隻貓入咗籠，都係佢第一時間通知我哋，萬分感謝！最後亦想感謝各界義工嘅加入及幫助。幫助呢隻貓咪脫離危困！」