元朗天台 11 隻兔被胡亂放養 1 死 10 傷 主人涉殘酷對待動物 當場被捕

昨夜凌晨，動保組織「兔廬」收到求助，求助人表示喺元朗幸福樓梯間發現棄兔 1 隻。義工收到消息後立即前往，搜索期間發現至少有 7 隻兔不停於通往天台鐵門及後樓梯來回，當中不少兔兔更喺垃圾堆中食緊剩餘飯菜及紙張，體型非常瘦，疑似營養不良。

及至今晨，義工去到現場一探究竟。由於天台鐵門並無上鎖，義工決定推門入去睇睇。「開門後，我完全被眼前景象所震懾。現場雜物遍地，凌亂不堪，環境極度惡劣。細心睇，發現至少有 7 隻兔兔，屎尿滿地，兔兔完全無可遮蔭嘅地方，亦冇食用草及食水。佢哋喺雜物中穿插，嘗試喺陽光暴曬下尋找遮蔭處。7 隻兔兔中，至少 2 隻兔兔身體狀況虛弱，亦有 1 隻已經死亡。」

義工當場報警，警察到場視察，立即認為「夠料」對屋主（相信是兔兔主人）作出拘捕。愛協督察及拯救隊，與漁護署亦相繼到場。所有單位都認為在場環境極為惡劣。各單位最後於雜物堆中，一共搵到 11 隻兔兔，當中 1 隻已離世。外藉户主涉嫌殘酷對待動物當場被捕，案件交由元朗警區動物罪案警察專隊跟進。其餘兔兔成為案件證物，全數由漁護署及愛協接收。

「此等涉嫌殘酷對待小動物嘅案，一單都嫌多。每個人嘅眼睛都可以監察社會，保護小動物人人有責，希望大家願意日後更留意身邊發生嘅事，如遇上可疑案件，唔好怕麻煩，刻不容緩作出舉報。小動物不能自救，但係只要每一個人願意，我哋人類係可以救到更多弱小但同樣寶貴嘅小生命。」

授權轉載：兔廬