幼犬患重病必須手術 主人促安樂死 獸醫一舉動助扭轉狗生

紐西蘭一位獸醫Oliver Reeve最近接獲一個令人傷心嘅CASE：有主人帶同年僅7星期嘅拉布拉多小狗求診，得知治療費用龐大後，決定將狗狗安樂死，Reeve實在唔忍心睇住原本有救嘅狗仔咁細個就要死，最後決定領養狗狗，並且安排佢做手術。 

Oliver表示，只得7星期大嘅拉布拉多幼犬Toby患有先天性疾病，如果唔做手術嘅話將會一世狗都活喺痛苦之中，當主人決定放棄並且決定為狗狗安樂死之後，Oliver Reeve即決定領養狗狗。Toby而家已經接受咗第一次手術，幾個月之後需要再做後續手術，相信身為獸醫嘅Oliver一定可以好好照顧Toby🥰

Oliver喺社交網上分享呢件事之後，好多網民都大受感動，力讚Oliver救咗小狗一命。不過亦都有人批評原主人嘅做法，Oliver亦都有為原主人講說話，佢認為主人真係因為能力不足先放棄狗狗，而且佢願意帶狗仔去求醫並且選擇安樂死，好過選擇不作為，要狗狗一路受苦🥲

其實養任何寵物都係好大嘅責任，因為養寵物係一生一世嘅承諾，而寵物必定會經歷生老病死，為寵物醫病亦都可以好貴，所以養寵物之前，必須要仔細考慮同埋衡量自己嘅經濟能力、住屋環境等等，千祈唔好貪一時新鮮就衝動行事，否則可能會害咗寵物嘅一生😖

 資料來源：X@Oliver Reeve