【靚仔唐狗尋家】年輕狗狗「發仔」流浪街頭 見人就跟獲救起 性格溫柔可夾小朋友
兩個月前，守護浪浪福利協會收到一個求助個案，有位叔叔喺上水區放狗嘅時候，發現有一隻有頸帶嘅唐狗喺街上面流浪，而且一直跟住叔叔唔肯走，睇落好肚餓又好可憐，叔叔唔忍心就咁睇住佢冇人理，於是就聯絡咗守護浪浪福利協會幫助接受狗狗。
協會其後發現發仔身上冇晶片，亦都曾經喺好多個群組度出現，都係有人發現發仔喺街上面流浪同埋跟住唔同嘅途人尾，義工唔捨得將乖巧嘅發仔放返去街上面流浪，決定要幫佢尋家。
發仔而家大約十個月大，已經絕育，由暫托人照顧。入咗屋之後嘅發仔毛色又黑又亮，而且眼仔上面有兩個啡點，真係又靚仔又可愛，而且發仔性格溫馴穩定，同小朋友相處都冇問題，實在係狗界暖男，如果有家庭想養一隻靚仔又溫柔嘅紳士狗狗，發仔絕對會係你嘅dream dog！
授權轉載：守護浪浪福利協會 Guard For Stray Welfare Association
其他資訊
