最高峰養逾200隻貓！ 台灣貓癡「馬爺爺」週二安詳離世 動物協會難過稱：朋友無權作醫療決定

【#好人好事】台灣有個愛貓愛到出晒名嘅英國籍貓奴「馬爺爺」，佢喺本週二下午安詳離世。據了解，「馬爺爺」馬凱杰喺1984年到台灣，一直熱愛收養貓貓，曾經喺高雄林園區養育超過200隻流浪貓，但年事已高後無力照顧，就陸續將佢哋送養。

一直有跟進「馬爺爺」情況同協助佢送養貓貓嘅高雄市關懷毛孩動物協會，尋日喺Facebook發文表示，「其實去年底馬爺爺住院，我們就預期到，他根本沒辦法出院了」，長期營養不良，馬爺爺多次受各種感染，有幾個月完全係依靠抗生素⋯⋯ 馬爺爺無法進食都仲要插鼻胃管灌食，又容易引發肺部發炎，「看他躺在病床上真的很難過，但我們都無權要求拔管或不裝呼吸器，因為只是朋友而已。」

協會又透露，馬爺爺來台30幾年， 雖然喺海外曾有子女，但係無人知佢啲仔女喺邊個國家，畢竟他們失聯好多年，是否仲喺世上都唔知。社會局曾嘗試聯繫英國同加拿大揾親人，但都無下文。而家馬爺爺只能喺冷凍櫃等待火化，但「有幾名善心人士不忍爺爺在最後一刻孤單離去，願意籌錢自費規劃一個簡單的告別式，等確定時間後會公告」。

願馬凱杰先生安息，祝願佢嘅所有貓貓都可以揾到幸福嘅領養家庭。

資料來源：高雄市關懷毛孩動物協會