年初鬆獅狗屍案件昨判囚4星期 認罪男子稱狗狗死前2天沒進食、不曾向獸醫求診

【#香港動保政策落後】今年初，葵涌一工廈嘅保安發現有個空置單位傳出惡臭，破門之後見到一具9歲鬆獅狗屍體，狀況係淨返皮毛同骸骨。當時31歲男主人翌日即被捕，受查時指鬆獅狗失去食慾2日後「相信佢係病死」，無向獸醫求診。男主人昨午喺西九龍裁判法院承認1項「放置腐肉及發出惡臭的物品在私人財產罪」，但控方指因屍體腐化已無法檢驗死因，而家亦已超過檢控期限，所以起訴唔到殘酷對待動物罪、虐畜罪⋯⋯ 裁判官溫紹明稱，「即係好似夾硬告一條咁，應該告嘅無告到…我明嘅但好無奈」，並批評被告極不負責任，最後判囚4星期。

上咗天堂嘅9歲鬆獅狗「肥妹」，原本由被告31歲運輸工人余凱杰同佢前女友喺青衣住所共同撫養，晶片登記主人為前女友。前年5月分手後，前女友搬走，由被告獨自照顧狗隻。今年1月15日，葵涌葵順工業中心男保安巡3樓嗰陣，發現空置單位入面個洗手間反鎖並傳出惡臭！強行闖進後發現「肥妹」屍體，毛孩關愛組義工到場後透過晶片聯絡到前女友，對方報警處理。

被告求情話「好後悔冇處理隻狗身後事」，裁判官就質疑一個狗主係唔會任由自己狗狗屍體腐爛，「相信佢未死之前，你已經唔理佢，唔理佢死活⋯⋯明知有病唔帶佢睇醫生⋯⋯咁同虐待有咩分別？你冇能力唔好養啦」，批評被告不負責任。最後，裁判官溫紹明判刑嗰陣指，喺佢處理過嘅案件中，呢單案「令人感覺最不快、相當難受」。

資料來源：The Witness 法庭線